EL PACTE DEL POUET
EN CONSTRUCCIÓ
Conoscuda cosa sea a cuantos son et serán, como yo, Habuabdele Yuan Fudäyl, alguazir et sennor d'Alcalá, me fago vuestro vasallo de vos don Alfonsso, primero fijo del Rey d'Aragon; et do vos ocho castielos: el uno dizen Pop, et el otro Tarbana, et Margarita, Churolas, Castiel, Alcalá, Galinera y Borbuchen.
Estos castielos sobre dichos vos do con sus alcarias, et con terminos et con pastos et con quanto les pertenece. Et destos avandichos castielos, do a vos señor don Alfonso, dos castielos luego, Pop et Tarbana. Retengo para mi et Alcalá et Borbuchent por eredat para mi et para mis fijos et para mi linage, por ser delos toda mi voluntade. Et los otros quatro castielos: Margarita, Churolas, Castiel et Galinera, estos tengo yo por tres annos, en tal convenencia que ayades vos, señor don Alfonso, la meetad de la renda, et yo la otra meetad; et cumplidos estos tres annos, que vos de los castielos, forros et quitos, sin toda mala pleytesia, con todos sos terminos et con todos sos derechos, assi como desuso dicho es. Et demas, fago esta convenencia conbusco sennor, qye, de cuantos castielos yo pueda ganar d'aquí adelante fasta los tre annos, que vos de la meetad de la renda; et, los tres annos cumplidos, que vos de los castielos que ganare con los quatro, assi como desuso es.
Et yo don Alfonso, por la gracia de Dios Infante, primero fijo del Rey d'Aragón, recibo a vos Habuabdele Yuan Fudäyl, alguazir et sennor d'Alcalá, por mio amado et mucho alto e muy onrado et mio fiel vasallo, et otorgo et do vos dos castielos: Alcalá et Borbuchen, por eredamiento a vos et a todo vuestro linage, por dar, vender, enpenar, et fer delos toda vuestra voluntade; et do vos las rendas de dos alcarias: de Hebo et de Tollos, por estos tres annos; et despues de los tres annos, que me lexedes estas dos alcarias con los otros castielos. Demás, juro et convengo et otorgo que tenga todas estas conveniencias assí como desuso scripto es, pero assí que del castielo d'Alcalá et de lo que vos do, que seades mio vasallo.
Data carta apud puteulum, XVI die aprilis, era MCCLXXXII.
 |